LEGAZPI CITY – Buminadol sa labi 800 an mga Bicolanong Overseases Filipino Workers na nakauli sa rehiyon Bicol sa irarom kan programa kan Overseas Workers Welfare Administration (OWWA).
Sa intrevista kan Bombo Radyo Legazpi ki OWWA Bicol Communications Officer Rowena Alzaga, nasa 843 na an nakauli sa Bicol asin pinakadakol digdi an pasiring sa Camarines Sur na pigsusundan kan Albay.
Padagos man an pagsierto kan OWWA Bicol sa biyahe kan mga OFWs na warang ulang.
Kaibanan sa mga naguling OFW an nawaran nin trabaho, pinauli kan employer, nagbabakasyon asin mabalik pa nin abroad alagad wara pa nin biyahe huli sa lockdown.
Pig-aasegurar man kan mga OWWA personnel na kumpleto an mga ini sa dokumento asin masunod sa magkakanigong protocol sa mga uulian na lokal na gobierno.
Mientras tanto, dae pa man nagtatapos an ipig-oofrecir na DOLE AKAP program kan ahensya kun sain makakaresibe nin P10, 000 an mga kwalipikadong benepisyaryo. (with report from Bombo Jona Napile)
