LEGAZPI CITY — Hale suboot an kayamanan ni Catanduanes Governor Joseph Cua sa pagkakaimbwelto sa illegal drug trade asin paggamit kan saiyang transportation businesses bilang cover.
Ini kuta an ibubuyagyag kan local journalist na si Larry Que antes pagbabadilon kan dae pa nabibistong suspek kan bulan kan Disyembre kan nakalihis na taon.
Nadiskubre suboot kan byuda ni Que na si Edralyn Pangilinan an nasabing impormasyon dapit sa gobernador makalihis an pagkagadan kan agom.
Base sa nakuang impormasyon ni Que, pinunan suboot ni Cua an pagkalakal nin ilegal na droga kan 1990s asin ngane pagtakupan an iligal na aktibidad, inilunsar kaini an ferryboats.
Nagnegosyo man ini nin provincial bus line ngane suboot maibyahe an shabu palaog asin paluwas nin Catanduanes.
Huli sa naging magayong resulta, digdi na nakabakal nin mga pagsadiri, makantidad na lunadan, asin nakapatugdok nin gas stations asin hotels sa bilog na probinsya.
Segun pa sa namaaram na kolumnista, aram suboot sa probinsya an iligal na pagnenegosyo ni Cua alagad warang may kusog nin buto na ibuyagyag ini huli sa takot.
Kun babalikan Nobyembre kan nakalihis na taon, nadiskubre an pinakadakulang shabu laboratory sa Barangay Palta Small, Virac, Catanduanes kun saen pinahimutikan ni Cua an pagkakaimbwelto suboot kaini sa kalakan makalihis na makaladkad an pangaran kaini.
Sa ngunyan, nahahampang sa kasong kasong murder si Cua katakod kan pagkagadan ni Que na isinangat ni Pangilinan asin National Press Club kan Mayo 2.
