LEGAZPI CITY- Pinahimutikan kan Phivolcs na sinda an nagpaluwas kan impormasyon dapit sa pagtama kan Big One o makusog na linog huli sa paghiro kan West Valley Fault sa pagultanan kan Pebrero 24 asin Marso 8.
Sa intribista ki Renato Solidum, Phivolcs Director, sinabi kaini na dae nin makakapagsabi kun nuarin mangyayari an nasambitan na linog urog pa na dae man nin teknolohiya sa kinaban na makakahula kun anong petsa asin sain matama an darakulang pagyugo.
Dugang pa kaini, an solamente sana nindang ginibo iyo an pagpreparar nin mga earthquake scenarios dapit sa mga pwedesir na magin kawsa kaini ngani na magamit bilang giya sa disaster preparedness.
Sigon pa digdi, warang basehan an naglalakop na impormasyon sa social media na prediksyon na nabilog kan sarong grupo huli sa paglinya kan mga planeta.
Napag-araman na naghihiro an nasambitan na fault line kada 400 hasta sa 600 taon asin an huring nairehistrong linog na kawsa kan paghiro kaini iyo an kan 1658 o 357 taon.
Nagkaigwa an PHIVOLCS asin MMDA nin pag-aadal dapit sa Big One na pigsasabing matama sa Metro Manila kan taong 2004 na pinondohan kan Japan International Cooperation Agency.
Digdi nagluwas na an magnitude 7.2 na linog pwedesir na makagadan nin hasta sa 34,000 katawo asin makalugad nin 100,000 huli sa mga nagabang edipisyo.
Mientrastanto, sinabi ni Solidum na bako pa basehan para sa linog an pagluwas kan mga oarfish huli ta dae pa nin bastanteng pag-aadal dapit digdi.
Nagpatanid man ini sa mga netizens na dae magpalakop nin salang impormasyon huli ta pwedesir ining magkawsa nin alarma sa publiko.
