LEGAZPI CITY-Naobserbaran kan Philippine Institute of Volcanology and Seismology (Phivolcs), an panibagong behavior kan Bulkang Mayon kumparar kan nakalihis na pagtuga kaini.
Segun ki Phivolcs Volcano Monitoring and eruption prediction division chief Mariton Bornas, sa intrevista kan Bombo Radyo Legazpi na igwang pagkakaiba ini huli ta haros warang anomalous monitoring parameter, warang haros na linog, paghuhubag, asin bako halangkaw an sulfur dioxide emission kumparar kaito.
Sa presente, naglagpas na sa 61 million cubic meters an estimated deposit kan Bulkang Mayon na igwang magkahalong lava, uson, asin pyroclastic volume.
Dagdag pa kan opisyal na harani an volume kaini ngonian sa volume kan magma kan 2006 eruption kun sain nagbuga nin pinakahalabang lava flow an Bulkan na nakalagpas sa 6km radius permanent danger zone.
Sinabi pa kan opisyal na dai mapundo an aktibidad kan Bulkang Mayon asin mahahaluyan pa ini huli ta wara pang senyales na mauubos an sulfur dioxide emission asin nagtetenir man liwat an ground deformation kaini.
Mientras tanto, padagos man an pagbabantay kan saindang quick response team urualdaw ngani aramon an hewas o rayo kan panibagong lava flow deposits, rockfall evets, asin uson sa Bulkang Mayon.
