LEGAZPI CITY – Pighayag kan sarong Election Watchdog na laoman na an mga manlain-laing pandaraya sa pagpopoon kan kampanya kan mga kandidato sa local position katakod kan nagdadangadang na 2025 Midterm Elections.
Magigirumduman na saaga, Marso 28 alas dose nin maagahon an pormal na pagpopoon kan Campaign Period para sa local positions.
Segun ki Kontra Daya Convenor Danilo Arao sa panayam ng Bombo Radyo Legazpi na kun magigin prangka siya, dae man mati na saaga na an primerong aldaw kan kampanya huli ta maski dae pa nagpopoon an election period an lantaran na an estilo ninda kan pangangampanya.
Mas matindi man an mangyayaring dayaan sa paagi kan, vote buying, paggamit kan pondo kan gobierno, misinformation asin red tagging.
Suhestyon kaini na dapat na i-call out o i-subject sa public hearing an mga pigsususpetyahan na nangre-red tag nganing maaraman kan mga botante na may mga siring kaining kandidato an nagdadalagan ngonian na pirilian.
Mawot nindang may ma-sampolan na mga kandidato nganing dae na pag-arugon kan iba pa.
Nanindugan si Arao na kulang an pag-call out sana kan komisyon huli ta dae man masasawata an mga ilegal na paagi kan kampanya sa puro blind item sana.
Pangapodan kaini sa publiko na magbantay, maghiro sa mga nangyayari sa palibot asin dae magduwang isip na i-suplong an mga kandidato na naggigibo nin illegal campaign.
