LEGAZPI CITY- Mahahampang sa dugang na kaso an mga indibidwal na magpupumirit na magsunad nin kandidatura sa ibong kan pagbaba nin sentensya kan korte na dae na pwedeng magdalagan sa anuman na posisyon kan gobierno.
Ipig-eksplikar ni Regional Elections Supervisor Atty. Maria Juana Valeza sa intrevista kan Bombo Radyo Legazpi na afuera sa pagreject kan kandidatura, posible pang masangatan nin kasong perjury an persona urog na kun dae man nagsumiter nin Motion for Reconsideration (MR) o nag-apelar sa Apellate Court para sa kaso.
Tinawang-duon man kan opisyal an honestong pagsimbag sa Item Number 22 kan Certificate of Candidacy (COC) na naghahapot kun binabaan na nin “final and executory” na ruling.
Dugang pa ni Valeza na may listahan naman sinda kan mga nasabing opisyal alagad kun magpumirit man giraray, inasegurar kaini na kakahampangon an magkakanigong konsekwensiya.
Mientras tanto, naglalaom an opisyal na sa hudyan na aldaw pa kan filing an dagsa kan mga potential candidates sa COMELEC kun kaya hagad kaini na magin matoninong an proseso mantang nagpatanid na kumpletuhon an mga pighahagad na rekisitos tangarig na warang aberya.
Nakipagkoordinar naman an komisyon sa pulisya para sa reasonable security durante kan filing.
