LEGAZPI CITY- Padagos an pasada kan mga jeepney drivers sa Albay sa ibong kan pangapodan kan transport group na Stop and Go Coalition na makisumaro sainda sa nationwide strike bilang protesta kontra sa propuestong pagphase-out sa mga luma nang jeep.
Enot kaini, nakipag-olay an presidente kan nasambitan na grupo na si Jun Magno sa ibang transport groups arog kan No to Jeepney Phase Out Coalition (NJPOC) asin Pinagkaisang Samahan ng mga Tsuper at Operator Nationwide (PISTON) Bicol na magbale sa nasambitan na strike ngunyan na aldaw ngani na kumbinsiron an Land Transporation and Regulatory Board (LTFRB) asin Department of Transportation (DOTr) na dae na ipaglawos an pagpakanselar sa mga lumang pampasaherong jeep.
Alagad dae nakisabay an nagkapirang mga tsuper arog sa Albay huli sa huma kan LTFRB na pwedesir na masuspinder an prangkisa kun magbale sa tigil-pasada.
Sa ngunyan, apektadong maray kan nasambitan na lakdang an mga commuters sa Metro Manila.
