LEGAZPI CITY – Bako dakula para sa non-profit research institution na IBON foundation an P6.793 trilyon na propwestong budget kan gobierno para sa masunod na taon.
Segun ki Ibon Foundation Executive Director Sonny Africa sa intrevista kan Bombo Radyo Legazpi na maski dakula pagdangugon an nasabing kantidad alagad kun ikokompara ini sa mga pondo kan nakaaging mga taon an kadiit sana ining nagdakula.
Importante suboot an dakulang pondo sa pagbaba kan ekonomiya kan Pilipinas sa mga huring quarter nganing dae na kapuson sa pagtutulak kan economic growth.
Punto niya man na maski dakula man an ipig-alokar na pondo sa sektor kan edukasyon na P928.5 bilyon an mapapaduman sana ini sa pagdudugang kan sweldo kan mga paratukdo asin bako para sa paghire nin mga paratukdo.
Pigtaram pa kaini na magayon na ibinalik ni Presidente Ferdinand Marcos Jr. an budget para sa Philippine Health Insurance Corporation (Philhealth) makalihis na gibuhon ining zero budget ngonian na taon an nagtetenir na hababa ini kompara kan budget kaini kan taong 2023.
Pagdoon niya man na kadiit sana an pighalangkaw kan Social Welfare spending arug kan mga ayudang kaipuhan kuta kan mga nagtitios na mga pamilya siring na sana kan Pantawid Pamilyang Pilipino Program (4P’s), Tulong Panghanapbuhay sa Ating Disadvantaged/Displaced Workers (TUPAD) asin maski an mga social pension.
Narisa niya man na sadit pa man liwat an pig-aalokar na pondo para sa sektor kan agrikultura na P239.2B na posible mang magresulta sa kakulangan nin suporta sa patubig, post harvest facilities asin iba pang imprastraktura na magin epektibo an ani kan mga paraooma na makakatabang kuta nganing mabawasan na an rice importation.
Ikinaugma man ni Africa an pagtuyaw ni PBBM sa mga flood control projects alagad kun hihilingon suboot an pondo kaini sa 2026 an nagtetenir ining dakula kompara sa ibang sektor na labing kaipuhan kuta kan lambang namamanwaan.
