LEGAZPI CITY – Klinaro kan Land Transportation Office (LTO) Bicol na dae ninda ipigbabawal an mga accessories sa mga behikulo sa kondisyon na dae ini nakakaulang sa salbadong pagbyahe sa tinampo.
Sa intribista ki Mar Majistrado, LTO Bicol Chief, sinabi kaini na nasasala an ibang motorista pag-abot sa mga pig-aapod na accessories kun sain pigkokonsidirar kan nagkapira na disenyo sana sa saindang behikulo an ibang parte arog kan side mirror asin helmet.
Tinawan duon ni Majistrado na bako sana dugang na gamit an mga ini alagad talagang parte na kan behikulo na dae pwedesir na halion o mawara tuyong nagba-byahe huli ta siertong dadakupon kan LTO enforcers o pulis asin sasangatan nin magkakanigong penalidad.
Ineksplikar man kaini na pigtutugutan ninda an ano man na klase nin headlight asin iba pang ilaw kan behikulo hasta sa bako ini nakakasula.
Saro man kaya suboot ini sa mga nagkakawsa nin aksidente kun kaya maski dae sinda nin mahigot na polisiya pag-abot sa mga dugang na ilaw, pwedesir man giraray nindang tuyawon an mga nakaka-kompromiso na sa road safety.
