LEGAZPI CITY — Namumundo an Philippine National Police (PNP) asin Philippine Drug Enforcement Agency (PDEA) makalihis na mabuyagyag na dakol pa palan na mga barangay officials an imbwelto sa iligal na droga.
Ini an ipinahayag ni PCI Arthur Gomez, tagapagtaram kan Albay PNP sa Bombo Radyo Legazpi.
Saro nang halimbawa digdi an pagkakadakop sa High Value Target kan Pio Duran na si Barangay Kagawad Benny del Mundo.
Segun ki Gomez, may itinao saindang listahan an PDEA kun sain nakasurat an pangaran kan mga opisyales kan barangay na may kinaaraman sa illegal drugs sa saindang lugar.
Nagsayuma muna an opisyal na magtao nin pangaran urog pa na ini na an saindang magigin priority target sa Project Double Barrel Reloaded.
Nagluwas suboot an impormasyon na ini durante kan isinagibong meeting kan PNP, PDEA asin iba pang ahensya.
Ipinagkokonsidirar ni Gomez na dakulang tabang an kooperasyon kan mismong komunidad na iyo na an nagtatao nin tip sa mga otoridad dapit sa mga iligal na aktibidad na nangyayari sa saindang palibot.
Ikinahahandal man kan opisyal an pagdeklarar kan mga barangay nin drug-cleared kun imbwelto an mismong mga opisyales kaini sa iligal na droga.
