LEGAZPI CITY- Pinagkakahaditan na maapektaran kun maglala an aktibidad kan bulkang Mayon, iyo an mga paraoma na nagtatanom asin nag-aataman nin hayop sa laog kan 6km radius permanent danger zone sa Barangay Mabinit, Legazpi City.
Segun ki Kapitan Dennis Nuñez sa intrevista kan Bombo Radyo Legazpi na nakaolay na niya an mga paraoma sa barangay asin inenganyar na ibaba muna an saindang mga ataman na hayop ngani na masierto an saindang seguridad.
Sa ibong kan pagtataas sa alert level 2 kan bulkan, pigtutugutan pa man suboot an mga paraoma na maglaog sa danger zone ngani na asikasuhon an saindang mga pananom alagad mahigot na pigmo-monitor an mga ini, asin pigpapayuhan na magbaba tulos.
Ipinagbabawal na man an pagkakaturog sa nasabing lugar.
Aminado kaya an opisyal na kadaklan sa mga nasasakupan na residente an naglalaom sa saindang mga pananom ngani na magkaigwa nin ganansya.
Huli digdi, kasabay kan pagtataong konsiderasyon, pigsi-sierto man kan mga lokal na opisyal an saindang seguridad.
Napag-araman na igwa na man na mga kapulisan na nakabantay sa border kan nasabing barangay ngani na mag-monitor sa mga naglalaog sa 6km radius permanent danger zone.
