LEGAZPI CITY-Uminabot na sa labi 4 milyong indibidwal o katumbas nin labi sa 1.2 milyong pamilya an apektado kan pinagsarong epekto kan bagyong Luis asin Maymay magin kan habagat.
Sa pinakabagong datos hale sa Office of the Civil Defense (OCD), nairehistro an mga apektadong populasyon sa Ilocos Region, Cagayan Valley, Central Luzon, Bicol region, Western Visayas, Zambonga Peninsula, Calabarzon, Cordillera Administrative Region, Metro Manila asin sa Mimaropa.
Sa mga apektadong pamilya, temporamenteng nagtetenir an labi sa 51,000 indibidwal sa mga evacuation center.
Sa presente, basado sa datos kan ahensya, nasa 21 an binawian nin buhay huli sa kalamidad.
Nakapagrehistro man nin pinakahalangkaw na numero kan mga nagadan sa Benguet na nasa 15 katawo, mantang nairehistro an iba pang mga casualties sa La Trinidad, Baguio asin Atok, na kadaklan nagadan huli sa landslide.
Parehong tulong indibidwal man an nagadan sa Rizal asin Batangas huli sa pagkalunod, pagkakuryente asin pagrasay nin daga.
Padagos pang pinaghahanap an tulong iba pa na nawawara hale sa Alaminos City sa Pangasinan, Batangas City asin Candelaria sa Quezon.
Nagrapado man sa labi P2.6 billion an kantidad kan danyos sa sektor kan imprastruktura mantang labi sa P347 million an danyos sa agrikultura.
Padagos man an paghahatod nin tabang kan gobierno sa mga nasalanta kan kalamidad.
