LEGAZPI CITY – Pinunan na ngunyan na aldaw an vaccination rollout para sa Bicol Regional Training and Teaching Hospital sa Legazpi City makalihis na maresibe kasuodma an 12, 000 doses kan Sinovac vaccines allocation sa Bicol.
Pasado alas-8:00 kasubagong aga, nangenot sa pagresibe kan bakuna si BRTTH Medicine Department head Dr. Edberto General na ipigkokonsiderar na “answered prayer” an nangyari.
Nagkulog sana nin diit an pagbakuna saiya alagad wara man namatian na adverse reactions.
Wara man na pagduwa-duwa sa desisyon asin naglalaom na magin ehemplo ngani na makumbinsi an iba na magpabakuna man.
Kaibanan kaining enot na vaccinees sinda Infectious Disease Specialist Dr. Anna Lynda Bellen asin Outpatient Department head Dr. Raoul Emmanuel Zantua.
Dai man nagkwalipika sa pagresibe kan Sinovac vaccine si BRTTH chief Dr. Sally Macinas huli ta 65-anyos na.
Nasa 1, 200 vials an alokasyon para sa first dose kan BRTTH mantang nasa 1, 800 na opisyal asin empleyado kan BRTTH an pig-assess sa pagresibe kan bakuna.
Afuera sa BRTTH sa Legazpi, nagbakuna na man sa pilot hospitals sa Camarines Sur ngunyan na aldaw.
