LEGAZPI CITY—Nagkundusir nin ICS coordination meeting an Municipal Disaster Risk Reduction and Management Office Baras, Catanduanes sa pakikipagkoordinar sa Philippine National Police (PNP), Bureau of Fire Protection (BFP), Philippine Coast Guard (PCG), Rural Health Unit (RHU), Tourism, asin Municipal Environment and Natural Resources Office (MENRO), para sa papaabuton na Semana Santa.
Segun ki MDRRMO Baras Head Engr. Khalil Tapia, sa intrevista kan Bombo Radyo Legazpi, ipighayag kaini na an kakulangan sa personahes asin assistance desks sa manlaen-laen na lugar an saindang naeeksperyensyahang kadificilan sa pagsabat kan Semana Santa.
Alagad sinabi kaini sa ibong kan mga kakulangan, ide-deploy man liwat ninda an mga personahes gikan sa mga katabang na ahensya kan gobierno para na man sa kun anong emerhensya asin ngani mamantenir an kaligtasan kan mga mabisita sa saindang lugar.
Mientrastanto, nagpagiromdom man ini sa mga namamanwaan na mag-doble ingat sa biyahe asin reparuhon an saindang mga kairiba asin gamit orog na an mga mapasiring sa saindang banwaan.
