LEGAZPI CITY — Pormal nang binukasan an Mayor’s Cup sa syudad kan Legazpi kasuudma.
Kasabay kaini, inilunsar an summer sports program para sa mga atletang jovenes.
Sinabi ni Roy Dimaculangan, City Sports Coordinator, na obheto kan sporting event na ini na maghanap nin mga potensyal na atleta na pwedesir na ilaban sa Palarong Bicol bitbit an bandera kan Legazpi.
Nakalinyada an mga kawat arog kan volleyball para sa mga below 18 years old na mabale sa patiribayan.
Sa masunod man na bulan kan Mayo, pupuunan an table tennis asin wrestling.
Sa ibong na lado, napag-araman na ma-atindir si Mayor Noel Rosal sa opening ceremony kan Palarong Pambansa 2017 sa San Jose de Buenavista, Antique ngani na personal na magsuporta sa mga atleta bako sana kan Legazpi City alagad gabos na marepresentar sa rehiyong Bicol.
Sigon ki Dimaculangan, 80 coach asin chaperon an kaibanan sa Palaro na gikan sa syudad kun sain tinawanan an mga ini nin P1000 kada saro mantang igwa man nin P2,500 an mga atleta apwera pa sa saindang mareresibeng incentibo kun makakasungkit nin medalya.
Sa Abril 23 pormal na pupuunan an Palarong Pambansa kun sain magpapatiribayan pag-abot sa manlaen-laen na sports an mga atleta hale sa iba-ibang rehiyon sa Pilipinas.
