Nagpahiling an Bulkang Mayon nin minor Strombolian activity ngonian na Dominggo nin maagahon, Abril 5, 2026 mantang an nagpapadagos effusive eruption kaini sa ika-89 na magkasunod na aldaw, segun sa Philippine Institute of Volcanology and Seismology (PHIVOLCS).
Basado sa monitoring kan Mayon Volcano Observatory sa ciudad nin Legazpi, nairehistro an aktibidad poon alas 12:32 nin aga hasta alas 12:39 nin hapon, na ipinahiling man sa time-lapse footage na ipinaabot sa opisyal na X (dating Twitter) account kan PHIVOLCS.
An Strombolian activity an sarong klase nin pagtuga kun saen nagpapaluwas an bulkan nin mga puffs o saradit na pagsabog nin lava, gas, asin saradit na gapo, imbes na makusog na pagsabog.
Pwedesir ining magbuga nin saradit na lava fountains na minabalik sa palibot kan crater.
Segun sa mga state volcanologists, padagos an Mayon sa pagpoprodusir nin mga incandescent lava flows, pyroclastic density currents (PDCs o “uson”), asin mga rockfalls mantang padagos na nagluluwas an magma hale sa crater.
Nagtetenir man an Bulkan sa Alert Level 3, na nagpapahiling nin halangkaw na lebel nin volcanic activity.
Bawal man liwat an paglaog sa 6-kilometer na Permanent Danger Zone huli sa peligro nin biglang pagtuga, lava flows, asin iba pang delikadong materyales.
.){kind=link}