Mayon activity, posible suboot na magdurar hasta sa bulan kan Abril

LEGAZPI CITY- Dae ipigigilid kan Albay Public Safety and Emergency Management Office (APSEMO) an posibilidad na magdudurar pa an aktibidad kan bulkang Mayon hasta sa bulan kan Abril.
Sa intrevista kan Bombo Radyo Legazpi ki APSEMO chief Dr. Cedric Daep, maingat suboot an Philippine Institute of Volcanology and Seismology (PHIVOLCS) sa pagbababa kan Alert Level 4 status urog na ibang ugali an ipigpapahiling sa ngonian kan bulkan asin aminadong pabago-bago ini.
Pag-eskplikar pa ni Daep na en kaso na magbaba kan alerto sa bulkan pasiring sa Alert Level 3, nagkapirang semana pa man an bibilangon para sa pagbaba sa Alert Level 2 na siyang maglalatag kan total decampment sa rinibong evacuees.
Mientras tanto, piglalaoman na dakula an mababawas sa numero kan mga apektadong residente sa evacuation centers en kaso maibaba na an alerto sa Alert Level 3 kun saen hale sa labi sa 66,000 na indibidwal sa datos, pwedeng mag-abot na sana ini sa 16, 105 persons o 4,021 families.
Inasegurar man kan opisyal na dagos-dagos pa man an relief assistance hasta dae naire-restore an kabuhayan kan mga residente.