LEGAZPI CITY – Nagpapadagos an pagtao nin asistensya kan Masbate PNP sa mga motorista na nagbi-biyahe ngunyan na Semana Santa.
Segun ki Masbate PNP Dir. PS/Supt. Froilan Elopre, bako sana an Holy Week an saindang pigbabantayan kundi pati na an Rodeo Masbate.
Nagpasalamat man an opisyal huli ta wara man na nairerehistrong problema sa ibang area kan probinsya asin warang nairehistro na anuman na maraot na insidente hasta sa ngunyan huli ta nagsusunod man suboot an publiko sa ley asin mga polisiya na saindang ipigpapaotob.
Mientrastanto, ipigbuyagyag man ni Elopre na igwang nagpasubli nin 12 kabayo na gagamiton sa pagpapatrolya asin sa police community relations kasabay na man kan pagpromotir kan turismo kan probinsya.
Sa ngunyan, sienerto kan opisyal na mahigot an saindang pagbabantay sa mga entry asin exit points sa Masbate huli ta nagpuon na man na mag-arabutan an mga bakasyonista.
