LEGAZPI CITY- An pagmamakulog kan mga kapulisan sa provincia kan Masbate an nagin susi sa padiit-diit na pag-abot sa pangaturugan kan sarong joven.
Ini makalihis na makapagtapos sa kolehiyo si Joshua Buri sa tabang kan Masbate 1st Provincial Mobile Force Company na nagin susi sa pagtatao nin mga oportunidad na makapag-adal ini.
Segun ki Police Staff Sergeant Jose Pacheco sa intrevista kan Bombo Radyo Legazpi na taong 2019 kan enot na mabisto ninda si Joshua kan nagpapatrolya an saindang mga tropa asin narisa na igwang pinag-aagihan an joven.
Kan kaolayon ini kan mga kapulisan, naaraman an angat na pigkakahampang sa pamilya asin sa pag-aadal.
Digdi suboot nagdesisyon an pamayuhan kan Masbate 1st Provincial Mobile Force Company na kupkupon kan platoon si Joshua asin tabangan na makapagpa enroll ngani na makapagpadagos sa pag-aadal.
An gabos na mga pangangaipo kaini an itinao kan nasabing hepatura asin tinabangan sa scholarship program.
Kan Agosto 29 sana kan makapagtapos si Joshua sa Masbate College sa kursong B.S Criminology.
Sinabi ni Pacheco na dakula man an pasasalamat kan pamilya ni Joshua sa tabang na ipinaabot kan mga otoridad.
Sa presente naghahanda na ini na magkuwa nin board exam asin pigtatabangan kan mga otoridad na makapag-exam sa National Police Commision.
