LEGAZPI CITY- Nagpaotob na nin mga lakdang an gobierno provincial kan Sorsogon makalihis kumpirmaron kan Department of Agriculture na nakapagrehistro na nin kaso nin African Swine Fever (ASF) sa Barangay San Antonio, Pilar, Sorsogon.
Ipinaluwas ni Governor Boboy Hamor an Executive Order No. 134-2026, na obheto na mapugulan an paglakop kan helang.
Sa irarom kan nasabing kasuguan, paramientras na ipinagbabawal an pagbiyahe asin pagdadara nin mga buhay na urig, karne asin iba pang pork products hali sa banwaan kan Pilar pasiring sa iba pang banwaan asin ciudad sa provincia kan Sorsogon.
Obheto kan nasabing aksyon na maprotehiran an mga nag-aataman nin urig sa lugar asin maprotehiran an hog industry asin an saindang kabuhayan.
Nakapalaog man sa nasabing kasuguan an mas mahigot na pagbabantay sa mga checkpoint, siring man an pag-activate kan Bantay ASF sa Barangay asin pagpapakusog kan biosecurity measures.
Mientras tanto, napag-araman na ipinagsugo man an security sealing sa mga behikulo na igwang kargang urig na pasiring sa Visayas asin Mindanao na nag-aagi sa Sorsogon.
Ini an ngani na masierto na maiibitaran an iligal na pagbaba kan saindang mga kargamento mantang nasa provincia.
