LEGAZPI CITY—Mahigot na pigpapaotob ngunyan an quarantine control border sa pirang banwaan sa provincia kan Catanduanes huli sa posibleng huma kan African swine fever.
Segun ki Catanduanes Provincial Veterinarian Dr. Ramil Evangelista, sa intrevista kan Bombo Radyo Legazpi, kabale sa may quarantine control border an Virac port, San Andres port kun sain may mga nakabugtak na checkpoint magin an pagbabantay sa coastal areas.
Aktibo man suboot an ASF task force kan gabos na munisipalidad sa saindang provincia.
Sa presente, warang nairerehistrong kaso an provincia nin nagpositibo sa helang, alagad may nagkapirang lugar an nag-report suboot na may nagadanan nin atamang urig kaya nagkolekta na sinda nin sample nganing masuri kun nagpositibo ini.
Mientrastanto, mensahe kan opisyal sa mga hog raiser na dae mag-panic huli sa presente wara pang kumpirmadong nagpositibong kaso sa naunambitang helang.
Sienerto kaini na padagos man an paggibo nin lakdang kan gobierno provincial nganing maprotehiran laban sa huma kan African swine fever.
