LEGAZPI CITY-Pigsierto ni Executive Secretary Ralph Recto na papadakulaon pa kan administrasyong Marcos an pondo asin suporta para sa mga lokal na gobierno ngani marikas an paghatod nin serbisyo sa publiko.
Sinabi ni Recto na maabot sa haros P1.4 trilyon an National Tax Allotment (NTA) kan mga local government unit (LGU) sa 2027, na pinakadakul sa historya kan nacion.
Sa kantidad na ini P448.70 bilyon an mapapaduman sa 1,491 munisipalidad, mantang P303.56 bilyon an itatagama sa mga lalawigan, P263.97 bilyon sa mga barangay, asin an natatada para sa mga ciudad.
Afuera digdi, nakatagama man an P58.53 bilyon para sa Local Government Support Fund (LGSF) sa irarom kan propwestong 2027 national budget. Ini na an pinakadakulang alokasyon para sa LGSF.
Segun kay Recto, gagamiton an pondo para sa mga proyekto arog kan kalsada, farm-to-market roads, water systems, health facilities asin mga edificiong posibleng evacuation centers.
Kabale man digdi an pagtatao nin 10 kilo na libreng bagas kada bulan sa haros walong milyong pamilya.
Sinabi ni Recto na pinasimple na man kan gobierno an proseso kan paghagad nin LGSF ngani mabawasan an requirements asin mapakaskas an paglaan nin pondo.
