Nagpahayag nin matinding pagmumundo an marine science community sa pamamaaram kan sikat na marine biologist na si Dr. Kent Carpenter, makalihis ining pagbabadilon sa saiyang harong.
Bisto si Carpenter bilang saro sa mga bnangengenot na seyentipiko sa pag-aadal kan coral reefs asin marine biodiversity sa Pilipinas.
Segun sa UP Marine Science Institute, dakula an nagin ambag niya ngani na mabisto an nacion bilang “center of the center of marine shore fish biodiversity” sa bilog na kinaban.
Saro man siya sa mga nagbusol na gibuhon na National Protected Area asin UNESCO World Heritage Site an Verde Island Passage huli sa natatanging yamang-dagat kaini.
Nangapudan man si Protect VIP lead convenor Fr. Edwin Gariguez nin hirarom na imbestigasyon sa paggadan ki Carpenter.
Paliwanag kaini na inalay kan siyentipiko an saiyang buhay sa pagpapahiling sa bilog na kinaban kan importansya kan Verde Island Passage asin pangangataman sa mga yamang dagat kan nacion.
Nagpaluwas man nin pahayag an Silliman University, kun sain naging research associate si Carpenter sa laog nin haros limang dekada.
Segun sa unibersidad na dakula an naging kontribusyon kaini sa pag-aadal kan marine biodiversity, coral reef conservation, fisheries management, asin marine pollution.
Kaibanan sa saiyang mga proyekto an Albatross Re-Collection Project, sarong mahewas na pag-aadal sa ebolusyon asin sitwasyon kan yamang-dagat sa Pilipinas,siring man an pag-aadal sa epekto kan microplastics sa mga sira asin iba pang lamang-dagat sa Negros Oriental.
Nagpahayag man nin pakikidumamay an Department of Agriculture–Bureau of Fisheries and Aquatic Resources.
Segun sa ahensya, magtetenir na buhay an pamana ni Dr. Carpenter sa lambang siyentipikong naging inspirasyon asin sa mga ecosytem na tinabangan kaini na mapangatamanan.
Afuera sa saiyang mga pananaliksik, nagserbi man si Dr. Carpenter bilang scientific adviser kan Pilipinas sa arbitration case katakod kan West Philippine Sea, kun sain nagtao siya nin mga report asin ebidensya dapit sa kalagayan kan mga coral reef sa nasabing kadagatan.
Aktibo man siyang nagsasagibo nin mga pag-aadal sa Tubbataha Reefs Natural Park.
