LEGAZPI CITY- Dagos man giraray an selebrasyon kan Magayon Festival ngonian na bulan kan Mayo sa provincia kan Albay sa ibong kan pinag-agihang krisis katakod kan pinakahudyan na pagputok kan bulkang Mayon.
Sa intrevista kan Bombo Radyo Legazpi ki Provincial Tourism, Culture and the Arts Office (PTCAO) head Dorothy Colle, finalized na an activities na isasagibo kun saen kaibanan sa mga highlights an photo and art exhibits, Mayon 360° Ultramarathon sa palibot kan bulkan, Trilogia o hiking sa tolong bulod sa Albay, makokolor na street presentation asin float parade siring man an patiribayan sa gayon asin tali sa Search for Daragang Magayon.
Kaabang-abang man an mga trade and industry actvities na magpi-feature kan mga gibong Bikolnon asin kompetisyon sa pagkakan kan masisiram na putahe na lada an main ingredient.
Mientras tanto, nasa P10 million an ipigtagamang pondo kan provincial government asin aminado si Colle na kinaipuhang magbawas kan budget kaya igwang nagkapirang events na dae na ipigsabay pa.
Sa ibong na lado, wara pa man na pinal na pag-oolay alagad naglalaom an mga Albayano na maatendir man sa selebrasyon si Miss Universe Philippines 2018 Catriona Gray.
