LEGAZPI CITY – Nakadeploy na an mga haros 700 na kapulisan sa 29 pribado asin pampublikong kamposanto sa enterong provincia kan Sorsogon katakod kan pag-obserbar kan Undas ngonian na aldaw.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na parte an deployment kan saindang mga personahes para sa “lakbay Katrangkiluhan” na pigpapangenotan kan gobierno provincial.
Afuera sa mga sementeryo an igwa man nin police visibility sa mga lugar na dadagsaon kan publiko ngonian na aldaw arug kan simbahan mantang motorist assistance center man sa kahalabaan kan maharlika highway nganing magtaong asistensya sa mga byahero.
Piglalaoman man ninda ngonian na maghapon na magigin matuninong an pag-obserba kan Undas huli sa presensya kan saindang mga personahes sa mga kamposanto.
Pigtaram pa kan opisyal na pinaka-importante sa sainda sa presente an matawan nin asistensya asin kaligtasan an publiko na mabisita sa saindang mga namaaram nang padangat sa buhay.
Siring suboot kan mga nakaaging pag-obserbar kan undas an mahigot nindang ipinagbabawal na darahon sa laog kan sementeryo an mga bagay arug kan patarom, badil, arak, asin makukusog na mga speaker o sound system.
May kapulisan man na nakabantay sa mga matatawong lugar nganing mabantayan an pagruluwasan kan mga kawatan na makikipagsabayan ngonian na aldaw.
Mantang ipigpagirumdom niya man nai Destacamento sa publiko na syertuhon na nakalock nin maray an pinto kan saindang mga kaharongan antes mag-ali, i-unplug an mga nakasaksak na mga appliances nganing malikayan an kasulo, asin mag-ingat sa pagmamaneho nganing malikayan an anumang aksidente.
