Legazpi City-Liwat na nagpagirumdom an Land Transportation Office Bicol sa mga motorista manungod sa road safety management kan lambang mga motorista.
Sa intrevista kan Bombo Radyo Legazpi kay LTO Bicol Director, Francisco Ranches Jr. , nagsasagibo na nin suway na imbestigasyon an LTO Bicol manungod sa mga posibleng rason kan sunod-sunod na aksidente sa tinampo na nairehistro sa Bicol lalo na sa probinsya kan Albay.
Dugang pa kan opisyal na padagos na maging alerto asin icheck nin marhay an mga vehikulo antes pa man na magbyahe. Ibitaran man suboot an pag’inom nin arak asin iba pa para dagos na daeng mairehistrong aksidente sa tinampo.
Mientras tanto padagos man an ginigibong checkpoints kan LTO sa mga motorista para maasigurar na igwang lisensya asin nagsusunod sa road safety managemet policy an mga motorista sa rehiyon.
Sa datos kan ahensya haros kadaklan kan mga rason kan aksidente an huli sa an nagkapira an nakainom nin arak, pigppipirot , over speeding asin igwang mga depekto sa parte kan saindang mga vehikulo.
