LEGAZPI CITY-Halangkaw an tsansa kan pinagbabantayang Low Pressure Area (LPA) sa luwas kan Philippine Area of Responsibility (PAR) na magin sarong bagyo.
Segun kay Masbate Weather Specialist Christian Allen Torrevillas, sa intrevista kan Bombo Radyo Legazpi na enkaso magin sarong tropical depression, aapodon ini sa pangaran na “Wilma”.
Makakaapektar man suboot ini sa dakulang parte kan Bicol Region pag-abot kan Huwebes kun sain maeeksperyensyahan an mga pag-uuran.
Laoman man na dakulang parte kan nacion an matatamaan kaini, alagad dai man pighahale an posibilidad na magbago pa an ruta kan bagyo.
Dagdag pa kan state weather bureau na posibleng magabot sa signal 2 an pinakahalangkaw na wind signal kaini.
Sa Bicol Region, mantang good weather man giraray saaga, laoman an mga rain showers o thunder storms sa hapon o banggi.
Magdadara man nin epekto an shearline, intertropical convergence zone asin southwest moonsoon sa rehiyon.
Sa kabilugan, ika-23 na bagyo na ini enkaso maglaog na sa Philippine Area of Responsibility.
