LEGAZPI CITY- Ipigkokonsiderar kan kapulisan na sarong trayumpo an pagkakaarestar sa No. 1 Regional Most Wanted Person sa Barangay Tilod, Baras, Catanduanes.
Sa intrevista kan Bombo Radyo Legazpi ki PLT Asuncion San Juan, Deputy Chief of Police kan San Miguel Municipal Police Station, binisto an suspek sa alyas na “Mang John”, 64-anyos asin residente kan San Miguel, Catanduanes.
Nahahampang ini sa 127 na kaso nin Statutory Rape asin suway na kaso nin 33 counts na Rape.
Napag-araman na 7-anyos pa sana an biktima pigsasapar na an nasabing pang-aabuso huli ta magkaibanan ini sa sarong harong.
Sa ngunyan, nagtetenir na an akusado sa kustodiya kan San Miguel Municipal Police mantang pighahalat an saiyang commitment order tanganing mailipat sa disposisyon kan BJMP Catanduanes.
Mientrastanto, siniguro kan mga otoridad na bukas an saindang opisina tanganing magtao nin asistensya sa mga biktima nin pang-aabuso sa probinsya.
