LEGAZPI CITY—Pigsaysay kan sarong abogado na dae matatawan nin due course kan Korte Suprema an mga petisyong isinunad laban sa desisyon kan Senate Impeachment Court mapadapit sa voting threshold kan posibleng pag-convict ki Vice President Sara Duterte.
Segun ki Atty. Earl Calingacion, sa intrevista kan Bombo Radyo Legazpi, dae matatawan nin due course an mga nasabing petisyon huli sa ‘premature’ pa an mga ini.
Madidifisilan suboot na mag-prosper an lado ni Atty. Vic Rodriguez na saro sa mga nagsunad nin petisyon, huli sa wara pang justiciable controversy kawsa sa wara pang impeachment conviction na nangyayari. Asin an ikaduwa, wara pang grave abuse of discretion na nangyari huli sa nagpaapod an Senado nin amici curiae nganing magpatabang sa pagdesisyon sa pagbaba kan voting threshold.
Paliwanag pa kan abogado, na matao sana kaya an mga korte nin cognizance kan mga kaso oras na igwa nang justiciable controversy na kun saen wara pang nasasabing danyos sa lado ni VP Sara huli sa dae pa man ini nai-impeach.
Sa ngunyan wara pa suboot na definite asin wara pang concrete and real dispute na magigin legally demandable asin enforceable na nagbabalgar sa direchos kan bise presidente huli sa wara pang desisyon kun mai-impeach siya o dae.
Pwedesir na idara sa korte ini kun may grave abuse of discretion na naapektaran an direchos ni Duterte alagad sa presente wara pa nin nangyayaring botohan kun guilty ini o bako sa paglilitis.
Dugang ni Calingacion na pwedesir sanang magpasiring sa Korte kun igwa nin grave abuse of discretion.
Segun saiya dae masasabing may grave abuse of discretion sa sinunad na petition for certiorari huli sa may apat na amici curiae na pinaapod nganing itukar an saindang interpretrasyon sa voting threshold.
Mientrastanto, tinawan-doon pa kaini na sa presente wara pang desisyon kun pira eksakto an threshold sa pag-convict ki VP Sara huli sa presente an desisyon pa sana an kun ano an magigin basehan asin wara pang pinal kun pira an magigin numero para digdi.
