LEGAZPI CITY- Nailipat na sa temporary evacuation center an ginatos na mga pamilya na naapektaran nin kasulo sa Barangay Banuyo, Pilar, Sorsogon na enot na nagtenir sa Banuyo Elementary School.
Segun ki Pilar Mayor Carolyn Sy-Reyes sa intrevista kan Bombo Radyo Legazpi na bakante na ninda an nasabing eskwelahan ngani na dae man maulang an klase kan mga kaakian.
An iba man an paramientras na nakikidagos sa saindang mga kapamilya sa ngunyan.
Segun sa alkalde na sa ngunyan bastante man an pagkaon kan evacuees alagad dakulang angat an liwat na pagpapatindog kan harong kan mga biktima nin kasulo.
Sa presente sinabi ni Mayor Reyes na nakikipag koordinar na sinda sa National Housing Authority para sa pabahay kan nasabing mga biktima.
Pigpapakarahay na suboot kan lokal na gobierno an mga dokumento na kinakaipuhan para sa nasabing housing assistance.
Katakod kaini, nangapudan pa an alkalde sa mga mawot pang magdonar na gibuhong prayoridad an construction materials o cash assistance para sa liwat na pagbangon kan mga biktima.
