LEGAZPI CITY—Matrayumpong nailigtas kan mga personahes kan Coast Guard Sub-Station Bulan an limang lunad na indibidwal makalihis na magkaaberya an piglunadang fishing banca sa Brgy. Butag, Bulan, Sorsogon.
Segun ki Coast Guard Bicol PIO Ensign Paul Laurence Literal, sa intrevista kan Bombo Radyo Legazpi, na nagkaigwa nin engine trouble an nilunadang motor banca huli kan overheating kun kaya nawaran ini nin kontrol mantang pigbabaybay an kadagatang pasiring sa Matnog, Sorsogon.
Dugang kaini na may nag-apod saindang concerned citizen na pigtaram na may fishing banca an naghahagad nin tabang.
Tulos man ining nirespondehan kan saindang mga personahes.
Napag-araman na gikan sa Brgy. Butag kan banwaan nin Bulan an behikulo asin pasiring sa Matnog, Sorsogon.
Sinabi man ni Literal, na wara man na nairehistrong nairido sa insidente asin nasa maray nang kamugtakan an limang lunad kaini.
Mientrastanto, nagpagiromdom ini sa publiko na bago magpasiring sa kadagatan, dapat na ipag-check an saindang mga motor banca nganing maibitaran an aberya.
En kaso man na may dae piglalaomang pangyayari tulos man dapat na ipagtaong-aram sa mga otoridad.
