LEGAZPI CITY — Labi an pagpapasalamat ngunyan kan alkalde kan munisipalidad kan Libon makalihis ining magawadan kan Department of the Interior and Local Government nin seal of good local governance.
Sa itinaong acceptance speech ni Mayor Das Maronilla kan nasabing banwaan, sinabi kaini na an naresibing pagnumbra an repleksyon kan pagigindedicated asin passionate kan saiyang mga konstituwentes na mapauswag pa an saindang lambang nasasakupan.
Dugang pa ni Maronilla na dae siya makapanubod na naresibe ninda an nasabing award huli ta aram niyang kulang sinda sa mga resources alagad nagibo man giraray ninda na mag angat asin maipahiling an saindang orag.
Iningganyar man ni Mayor Das an saiyang mga konstituwentes na padagos na mangarap asin warang imposible sa saindang mga libonguenos.
