LEGAZPI CITY – Puga-puga man an pigsasagibong monitoring kan Lokal na Gobierno kan Guinobatan, Albay mapadapit sa epekto kan paghagupit ni Super Typhoon Uwan.
Segun ki Guinobatan Mayor Gemma Ongjoco, sa intrevista kan Bombo Radyo Legazpi na naka-standby an saindang pwersa katabang an mga manlain-laing ahensya kan gobierno nganing magtaong asistensya sa saindang namamanwaan.
Bukas man suboot an saindang Municipal Hall para sa mga residentes, motorista, asin byahero na mawot magsirong asin magpalihis na magmaray na an sitwasyon.
Paglilinaw niya man na dae sinda makaluwas sa presente huli sa kusog kan paros asin uran na namamatean sa saindang banwaan alagad sa kagayunan an wara sindang nairehistrong dae piglalaoman na insidente.
Pigtaram pa kan opisyal na uminabot na sa labi 9,000 na mga pamilya an paramientras na nagtetenir sa mga evacuation area o katampad kan 27,000 na indibidwal.
Pagdoon niya pa na nalaoman na ninda na babahaon liwat an Barangay Masarawag, urog nang mas makusog na mga pag-uuran an dinara ni Bagyong Uwan kumpara sa mga nakaaging raot nin panahon arug kan habagat.
Padagos man na pigbeberipika ninda Mayor Ongjoco an impormasyon mapadapit sa sarong tulay na riles kan Philippine National Railways na haros magaba na huli sa kusog kan tubig nagraragasa.
