LEGAZPI CITY- Nanindugan an National Union of Journalists of the Philippines (NUJP) na napapanahon ng maipasar sa Pilipinas an sarong ley na magtataong padusa kontra sa mga personang magsasagibo nin red tagging o pag-imbwelto sa sarong indibidwal o grupo sa mga terorista asin rebelde.
Kasunod ini kan mga kontrobersiyal na pahayag na binutasan kan nagkapirang miyembro kan kapulisan, militar asin ibang opisyal kan gobyerno na pigkokonektar an mga aktibisto asin kritiko kan gobyerno sa mga terorista.
Sa intrevista kan Bombo Radyo Legazpi kay NUJP Chairman Jonathan Santos, kasaro an saindang grupo sa mga nagpapahayag nin suporta sa pigbubusol ngunyan ni Senate Minority Leader Franklin Drilon na Senate Bill No. 2121 o an“Act Defining and Penalizing Red-Tagging”.
Sa nasabing resolusyon pigtatawanan nin padusa na hasta sa 10 taong pagkakakarsel an sisay man na magkokonektar o mabansag sa sarong persona o grupo bilang miyembro o konektado kan terorista asin rebelde na wara nin magkakanigong basehan.
Segun kay Santos, importanteng maipasar na an bill ngani na matawanan nin proteksyon an dakol na aktibista asin kritiko kan gobyerno na nalalaag sa alanganin an seguridad huli sa pang-rered tag kan adminsitrasyon.
Kaiba man sa mabebenispisyaran kaini an mga miyembro kan media na nauulangan na an trabaho huli sa mga akusasyon nin suboot koneksyon sa mga rebelde.
Magigirumduman na ngunyang bulan sana kan magpahayag nin pankondenar an dakol na grupo makalihis na magpaluwas nin memorandum circular an Department of the Interior and Local Government (DILG) kung sain pinangaranan an grupong COURAGE asin ACT-teachers na suboot front kan Communist Terrorist Group.
