LEGAZPI CITY—Ipigklaro kan Legazpi City Police Station na wara sindang nakuang ano man na bomba sa laog kan sarong unibersidad sa ciudad kan Legazpi partikularmente na sa University of Santo Tomas – Legazpi.
Ini nangyari makalihis makaresibi an saindang opisina mapadapit sa soboot bomb threat sa nasabing unibersidad na nagkawsa nin kahaditan sa namamanwaan.
Segun ki Legazpi CPS, Police Executive Master Sergeant Carlos Paña, sa intrevista kan Bombo Radyo Legazpi, na sa ngonian magkakaigwa pa nin full-time coordination sa manehamiento kan unibersidad kun mapagibo sinda nin thorough investigation mapadapit sa insidente.
Sinabi kaini na an nakuang surat dapit sa soboot bomb threat na mangyayari sa laog kan eskwelahan an nasa kustodiya na ninda ngani na magin basehan sa pagkundusir nin imbestigasyon.
Nangapudan man an opisyal sa publiko na kun may naaraman sinda na mga siring na insidente na tulos dapat ining ipaaram sa mga otoridad.
Siring man na dae ini paggibohon na karaw huli ta nagkakawsa ini nin alarma sa publiko.
Nagpagiromdom man ini sa mga naggagamit nin social media na nagpapakalat nin salang impormasyon na magin responsable sa saindang piggibo huli ta pwedesir na masunadan man sinda nin magkakanigong kaso.
