LEGAZPI CITY – Pigtawan doon kan Local Government kan ciudad kan Legazpi na numero unong problema nindang nahihiling iyo an halangkaw man liwat na numero kan mga unemployed o mga tawong warang trabaho.
Segun ki Mayor Hisham Ismail sa intrevista kan Bombo Radyo Legazpi na basado sa saindang datos an nag-aabot sana sa 73% an nairehistrong may trabaho mantang 27% an warang trabaho na pigkokonsidera nindang halangkaw.
Kun kaya mawot nindang magkaigwa nin sulusyon dapit digdi sa paagi kan pagkokondusir nin mga job fairs nganing mapahalangkaw pa kan oportunidad partikular na sa saindang nasasakupan.
Maugma siya na inaprobitsaran kan mga jovenes an saindang pa-jobfair huli ta saro ini sa mga permanenteng solusyon na kinakaipuhan nganing mabawasan an 27% unemployed rate sagkod sa mawara na ini.
Pigtaram pa kan opisyal na dapat flexible an gobierno sa pagtanggap sa mga investor asin negosyong mawot magpadakula huli ta ini an magigin lyabi para sa mas dakulang opurtonidad na makakatabang man sa kadakol na tawo.
Afuera sa pagtaong sulusyon sa mga unemployed an mawot man niyang matutukan an problema sa basura partikular na an mga natatambak sa mga salog na nagtatao man nin problema sa mga residente.
Warang patod man an saiyang pagirumdom sa publiko na itapok sa tamang tapokan urog na ngonian na maabot na an rainy season na makawsa nin labing pagbabaha huli sa mga baradong drainage system.
