LEGAZPI CITY- Mahigot na nakabantay an mga kapulisan kan Legazpi City ngani na mamantenir an katrangkiluhan sa bilog na obserbasyon kan Semana Santa.
Napag-araman na naka full alert na an mga kapulisan ngani na mas matanos na maotob an saindang mandato.
Segun ki PLt. Col. Arthur Tagtag, Acting Chief of Police kan Legazpi City Police Station sa intrevista kan Bombo Radyo Legazpi na regular an deployment kan mga kapulisan sa siyam na mga darakulang simbahan sa ciudad.
Afuera digdi, nakatutok man an saindang mga personahe sa mga pinag-aantisiparan na pagruso kan mga deboto sa Guadalupe Shrine sa Barangay Buraguis.
Napag-araman na enot na man na nagpapalayog nin mga drones an hepatura bilang parte kan pagbabantay sa sitwasyon.
Mientrastanto, nagpagirumdom man an hepe sa publiko na magkakaigwa nin mga road closure sa Biyernes Santo huli sa nakatalaan na mga prusisyon.
