LEGAZPI CITY – Padagos an pagsasagibo kan Legazpi City Local Government Unit nin Declogging operation sa Macabalo River na harani sa Legazpi Boulevard.
Segun ki Legazpi City Mayor Alfredo Garbin sa intrevista kan Bombo Radyo Legazpi na saro ini sa saindang pre-emptive action asin flood mitigation measures.
Igwa na nin pigbugtak na dredging plan kun sain pighukay an baybay kan naunambitang salog asin pigbabalyo sa ibang lugar nganing magduru-diretso an bulos kan tubig pasiring sa kadagatan.
Afuera sa makukusog na uran partikular na kun darakula an volume kan uran na pigbabagsak sa ciudad, pighihiling man ninda na rason kan pagbabaha an pagigin ababaw kan mga salog.
Pigtaram pa kan opisyal na saro an naunambitang salog sa mga major river kan Legazpi na haros nagkaigwa na nin sandbar an bukana kun kaya nagkakawsa ini nin pagbabaha asin haloy na pag hupa kan tubig baha sa ciudad.
Nagpapasalamat ini sa Department of Works and Highways sa pagpapagamit kan saindang excavator nganing matawan nin magkakanigong aksyon an mga pangenot na problema kan ciudad.
Aminado kaya ini na sa presente, kadakol na salog sa ciudad an marikas na nag-aapaw pag mauran nin huli ta mga ibabaw na an mga ini asin dae na nakakalutan sa haloy ng panahon.
Padagos an pangapodan ni Mayor Garbin an pagdisiplina sa kaharongan mapadapit sa proper waste management asin likayan an pagtapok sa kun sain-sain na nagbabara sa mga imburnal asin bulusan kan tubig na nagigin rason man kan mga pagbabaha na nakakaperwisyo sa ciudad.
