LEGAZPI CITY- Nagsasagibo na nin preparasyon an pamayuhan kan Legazpi City Water District para sa bastanteng suplay nin tubig na gagamiton sa Palarong Bicol 2025.
Marurumduman kaya na mapuon na ngunyan na Marso an nasabing sporting event kun sain pinag-aantisiparan na maabot sa ciudad kan Legazpi an mga partisipantes hali sa manlain lain na mga provincia.
Segun ki Legazpi City Water District General Manager Rico Salazar sa intrevista kan Bombo Radyo Legazpi na sisiertuhon ninda na magigin consistent an suplay nin tubig pasiring sa mga billeting centers.
Napag-araman na nagkaigwa na nin intervetion sa nagkapirang mga eskwelahan asin pigta-target na magkaigwa na nin permanenteng water distribution facilities sa laog mismo kan mga eskwelahan.
Paliwanag kaini na sa ibang mga eskwelahan, an Parents Teachers Association an nagsisimbag sa gastos sa konsumo sa tubig.
Dugang pa kan opisyal na kun igwa man na suplay sa luwas, bako ini tugma sa water distribution system sa laog kan mga eskwelahan.
Pinaglalaoman kaya na kun mas dakol an mga delegado sa laog kan sarong eskwelahan, siertong mas dakol man an makokunsumong tubig.
