LEGAZPI CITY – Nadukayang nagpapalataw pataw sa salog asin wara nang buhay sa kabuludang parte kan Barangay San Miguel, Panganiban, Catanduanes an bangkay kan lalaking pirang aldaw nang nawawara sa municipalidad kan Viga kan naunambitang provincia.
Segun kay Assistant Investigator kan Panganiban Municipal Police Station (MPS) Police Corporal Jerremy Paytan sa intrevista kan Bombo Radyo Legazpi na nasa state of decomposition na man an hawak kan biktima nin huli ta pwedesir suboot na pirang aldaw na ining nakababad sa tubig.
Susog sa saindang inisyal na imbestigasyon na may nagreport sa saindang hepatura kan nakaaging Enero 6 sa presenteng taon mapadapit sa nawawara na abaca stripper sa munisipalidad kan Viga.
Makalihis na maibaba an bangkay, tulos ining pina-identipikar sa pamilya kan nawawarang para-abaca asin positibo ninda ining minidbid na iyo ini an lawas kan saindang kaparientes.
Pigtaram pa kan imbestigador na base sa salaysay kan kapamilya na nag-baba nin abaca an biktima hale sa kabuludan nganing ideliver alagad napansin na ninda na dae na ini buminalik asin nawawara na.
Wara man sindang nahihiling na may nangyaring foul play nin huli ta dae man nahilingan ki mga sensyales na ginadan an biktima.
Sa presente, Pigsairarom na an bangkay sa post mortem examination nganing maaraman kun ano an tunay na kawsa asin oras kan saiyang pagkagadan.
Pangapodan ni Paytan sa publiko na ibitaran na muna an pagsakat sa mga kabuludan partikular na kun mauran nin huli sa posibleng huma kan landslide.
