LEGAZPI CITY—Dae na mabisto an sarong hawak kan sarong indibidwal makalihis na madukayan ining nagpapataw-pataw sa baybayon kan Purok 1, Sitio Calobihan, Barangay Marinab, Bulan, Sorsogon.
Segun ki Bulan Municipal Police Station Chief of Police, Police Lieutenant Colonel Virgil Bibat, sa intrevista kan Bombo Radyo Legazpi, makalihis na mai-report sainda an insidente tulos sindang nagkundusir nin imbestigasyon sa pakikipagtabangan sa Philippine Coast Guard – Bulan.
Makalihis na magpasiring sa nasambitang lugar, digdi na nahiling an hawak kan biktima na wara nang sulot na bado asin nasa state of decomposition na.
Sa presente, ipigsairarom na sa otopsiya an biktima asin nakikipagkoordinar na man an mga otoridad sa iba pang kataning na mga lugar para sa posibleng pagkakabisto kan nasabing indibidwal.
Dugang ni Bibat, na posibleng nalamos suboot an biktima.
Mientrastanto, padagos pa an mga pigsasagibong imbestigasyon kan mga otoridad mapadapit sa insidente.
Abiso man kan opisyal partikular na sa namamanwaan kan Bulan Sorsogon na en kaso may kinakaipuhang asistensya na kaipuhang dumanan kan saindang kapulisan na dapat makipagkoordinar sa saindang opisina nganing masimbagan an saindang pangapudan.
