LEGAZPI CITY- Pinatunayan kan Department of Education V asin kan Bicol Vulcans na pinagkakasararo kan sports bako sana an mga atleta kundi magin an mga eskwelahan.
Segun ki DepEd Bicol Spokesperson Mayflor Jumamil sa intrevista kan Bombo Radyo Legazpi na huli sa mainit na pagtanggap sa mga delagado kan rehiyon sa nakalihis na Palarong Pambansa 2026, nagwalat man nin mga proyekto an ahensya sa Bayugan Central Elementary School (BCES) Special Education (SPED) Center.
Pigkakarkulong nasa P4.1 million na kantidad nin proyekto an ginibo kaibanan an Manobo-Inspired Learning and Wellness Hub, mural painting activities, vegetable garden, eco-walk bridge, waste management facilities, renovation kan mga comfort rooms, poultry farming facilities, siring man an Bayugan Holistic Education and Beginners Sports Park, asin Nurture Environment, Nourished Earth Project.
Napag-araman na mismong an mga personahe kan Department of Education Bicol an personal na nagtrabaho kan nasabing mga proyekto antes pa man an pagtatapos kan nasabing sporting event.
Segun ki Jumamil na durante kan saindang pagtetenir sa nasabing billeting quarters, sinierto kan eskwelahan asin kan lokal na gobierno na fully airconditioned an mga classrooms asin preparado an mga pasilidad kaya nagin komportable sinda sa bilog na durasyon kan Palarong Pambansa 2026.
An saindang ginibo na mga programa an paagi suboot kan pasasalamat kan rehiyon.
