LEGAZPI CITY—Gadan an sarong 25-anyos na lalaki makalihis malamos sa sarong salog sa Barangay Sibacungan, Bato, Catanduanes.
Segun ki Bato MPS PIO Police Staff Sergeant Renen Delos Reyes, sa intrevista kan Bombo Radyo Legazpi, na nag-dive suboot an biktima alagad dae na ini naglataw sa katubigan.
Tulos man ining nirespondehan kan saindang kapulisan kairiba an Bureau of Fire Protection, Philippine Coast Guard, Municipal Disaster Risk Reduction and Management Office Bato.
Nagkundusir nin search and rescue operation an mga otoridad sagkod uminabot na sa search and retrieval operation.
Nadukayan an biktima sa irarom na parte kan salog, asin napag-araman na dae tatao maglangoy ini.
Dugang pa ni Delos Reyes na wara man na foul play an insidente.
Segun sa opisyal na baka pighuna kan biktima na hibabaw sana an tubig huli ta malinaw asin bako ini mahukol na maray.
Alagad, tinawan-doon kaini na bako boot-sabihon na malinaw an tubig an hababaw na.
Mientrastanto, nagpagiromdom man an opisyal sa mga magurang na siertohon na pag-aramon kun masaen an saindang aki.
Siring man, nagpagiromdom ini sa kajovenesan na magpaaram nin toltol kun saen sinda mapasiring.
Kun may balak man na maglangoy o magkarigos, siertohon na may kairibang tatao na maglangoy nganing maibitaran an siring na insidente.
