LEGAZPI CITY—Arestado an sarong lalaki makalihis an suboot panlulugos sa sarong menor de edad sa banwaan kan Libon, Albay.
Segun ki Libon Municipal Police Station Acting Chief of Police Police Major Roberto Flores Jr., sa intrevista kan Bombo Radyo Legazpi, an biktima sarong 14-anyos mantang an suspek sarong 64-anyos, sarong paraooma—parehong residentes kan nasambitang banwaan.
Segun sa opisyal na nag-report suboot an ina kan biktima sa saindang kustodiya kaiba an saiyang 14-anyos na aki huli sa suboot panlulugos kan suspek sa menor de edad.
Basado sa salaysay kan biktima, inapod suboot siya kan suspek mantang nagpapahingalo sa saindang harong, alagad kan nakarani an biktima an bigla suboot na ginuyod kan suspek sa sarong abandonadong harong sa lugar asin digdi nangyari an pang-aabuso.
Mantang nangyayari suboot an insidente, an nahiling kan tugang kan biktima an pangyayari na rason nganing tulos na magdulag an suspek.
Tulos man na nag-report an biktima sa ina mapadapit sa insidente asin naghagad nin tabang sa mga otoridad.
Dugang ni Flores, na makalihis an pirang oras na operasyon kan kapulisan an tulos na naarestar an suspek.
Mientrastanto, nasa kustodiya kan Libon MPS an suspek asin mahahampang sa kasong statutory rape na warang pigrerekomendang piyansa.
