LEGAZPI CITY- Arestado an sarong lalaki makalihis na paputukan an 28-anyos na biktima na pig-aakusarang mahabon sa Barangay Gadgaron, Matnog, Sorsogon.
Arestado an suspek na si Esmundo Garcia 57 anyos mantang nagpaparahay pa sa ngunyan sa ospital an biktimang si Larry Daang 28 anyos.
Susog sa impormasyon na naguno kan Bombo Radyo Legazpi, nakaresibe nin report an mga otoridad sa insidente nin pambabadil sa lugar kung kaya tulos man na nagresponde asin naabutan an suspek na may kapot na improvised shotgun na igwa pa nin bala.
Napag-araman na pig-aakusaran kan suspek an biktima nin suboot panghahabon sa saiyang fish pond rason nganing paputokan ini gamit an nasabing badil.
Tulos na inarestar kan mga pulis an suspek mantang idinalagan man sa Matnog Medicare Hospital an biktima na nagsapar nin lugad sa saiyang hawak.
Sa ngunyan, nakakarsel na an suspek na nahahampang sa patung-patong na kasong Attempted Homicide asin pagbayolar sa “Comprehensive Firearms and Ammunition Regulation Act” huli ta wara man nin lisensya an ginamit na badil.
