Nangapudan si Senate President Pro Tempore Panfilo “Ping” Lacson sa publiko na ireport sa mga awtoridad an mga gasolinahan na nagpapataas kan presyo kan gasolina antes an nakatalaan na oil price adjustment.
Segun ki Lacson, posibleng magbalgar sa Downstream Oil Industry Deregulation Act of 1998 asin Consumer Act of the Philippines an amay na paglangkaw kan presyo o sobrang pagbakal nin langis nganing itago.
Kun saen an mga violator an puwedesir manimbag sa irarom kan probisyon laban sa hoarding, profiteering asin pananamantala sa pagpabakal.
Katakod kaini, inabisuhan kan senador an publiko na tulos na isumbong sa Philippine National Police (PNP) asin sa saindang lokal na gobyerno an mga establisyemento na nagbabalgar kan polisiya.
Importante suboot an pagbantay kan publiko nganing maprotehiran an mga konsumidores laban sa pangaabuso sa presyo.
Mientrastanto, naenot nang nagpaluwas nin direktiba an Department of Energy (DOE) sa PNP asin lokal na gobyerno na bantayan asin ireport an siring na mga bayolasyon ngani na tulos na masangatan nin magkakanigong kaso laban sa mga operator kan gasolinahan.
Mantang naghahanda na an publiko para sa saro pang paglangkaw kan presyo kan lana sa langis huli sa paglangkaw kan presyo kaini sa global market kasunod kan tensyon sa Middle East.
Piglalaoman na malangkaw an presyo kan kerosene nin sagkod sa P24.92 kada litro, diesel nin P19.62, asin gasolina nin P10.43, piglalaoman man na i-anunsyo an pinal na oil price adjustment sa Lunes, Marso 9.
