Nagkaigwa liwat nin mainit na simbagan si Senador Panfilo Lacson asin si Senador Rodante Marcoleta sa plenaryo kan Senado makalihis na tuyawon ni Marcoleta an kawaran nin official committee report hasta ngonian, kasunod kan serye nin hearing kan Senate Blue Ribbon Committee dapit sa mga anomalya sa flood control projects sa nasyon.
Segun ki Lacson, tinawan na nin initial report an lambang senador, kun saen an kada saro igwa nin sadiring kopya na may watermark kan kanya-kanyang opisina.
Ginibo suboot ini kan saiyang ofisina nganing malikayan an nangyaring pag-leak kan inisyal na report kan komite kan nakaagi.
Buwelta man ni Marcoleta na igwa nin nagkapirang kakulangan an committee report ni Lacson, partikularmente an kawaran nin mga importanteng pangaran arog ni Adrian Bersamin, na dating nagsirbe bilang Undersecretary asin pamayo kan Presidential Legislative Liaison Office (PLLO).
Inungkat man ni Sen. Marcoleta an suboot pagpirit kan mga kapwa niya senador arog ni Sen. Panfilo Lacson na pro-China siya.
Sa simbagan liwat ni Lacson asin Marcoleta sa plenaryo kan Senado, sinabi ni Marcoleta na mapaapod siya nin hearing sa Marso 12 dapit sa isyu kan West Philippine Sea asin an territorial boundaries kan Pilipinas sa pig-iiwalan na kadagatan.
Kabali sa mga inimbitaran iyo an mga representante kan National Mapping and Resource Information Authority (NAMRIA), Philippine Coast Guard, Philippine Navy, asin iba pang darakulang personalidad arog ninda dating Justice Antonio Carpio, asin iba pa.
Kan hinapot ni Lacson si Senate Committee on Foreign Relations Chair Erwin Tulfo, sinabi ni Tulfo na dae makakaatendir an mga imbitadong ahensya asin personalidad.
Huli kaini, pigdoon ni Lacson na ‘may pigkukumpirma si Marcoleta na dae pa man nakukumpirmar’.
