LEGAZPI CITY- Luminobo pa sa labi sa P250 million na kantidad nin humanitarian assistance an naibarewas kan mga otoridad sa rehiyong Bicol.
Ini an katakod kan mahewas na distroso na iwinalat kan bagyong Kristine sa rehiyong Bicol.
Segun ki Department of Social Welfare and Development Bicol Director Norman Laurio sa intrevista kan Bombo Radyo Legazpi na labi na man sa 100,000 na family food packs an naipanao, afuera pa sa mga non-food items, hot meals asin iba pa.
Afuera digdi, igwa na man na mga lokal na gobierno na napaabutan nin pinansyal na asistensya kun sain P10,000 an naresibe kan mga may totally damaged na harong asin P5,000 sa mga partially damaged.
Aminado man an opisyal na igwa pang mga barangay na isolated huli sa naraot na mga tinampo kaya kinakaipuhan na aprobitsaran an mga water asin air assets kan Philippine Coast Guard asin Philippine Army ngani na makapagtahod nin tabang sa mga apektadong residente.
Paliwanag ni Laurio na an sarong family food pack an kasya sana sa laog nin tulong aldaw kaya kinakaipuhan na padagos na makipag koordinar sa mga apektadong komunidad.
Mientras tanto, sa ibong kan padagos na relief operations kan ahensya sinierto man kan opisyal na igwang bastanteng buffer stock an ahensya ngani na makapag handa sa iba pang mga kalamidad na posibleng tumama sa rehiyon.
