LEGAZPI CITY-Labi sa sarong milyon na mga estudyante sa Grade 11 sa bilog na nacion an nadidifisilan sa reading comprehension, segun sa sarong report kan Second Congressional Commission on Education (EDCOM 2).
Napag-araman kan Department of Education (DepEd) sa ikinundusir na Senior High School literacy assessment kan Marso 2026 na nasa 1.3 milyon sa 1.4 milyon na mga estudyante sa Grade 11 an igwa nin mga problema sa pag-intindi sa saindang pagbasa.
Segun ki Simoun Antonio Salinas kan EDCOM 2, 12% sana kan Grade 11 students an makonsiderar na “independent learners” o an lubos na nakakaintindi kan saindang binabasa.
Sa numerong ini, haros anom sa kada sampulong estudyante an nasa “frustration level”, an pinakahababang lebel kan kun saen haros dai ninda nasasabutanan saindang binabasa.
Mientras tanto, haros tulo sa kada sampulong estudyante an nasa “instructional level,” na nangangaipo pa nin giya hale sa paratukdo ngani masabotan an teksto nasaindang pigbabasa.
Pigbabasol man kan ACT Teachers Party-list an suboot sistematikong problema sa sistema nin edukasyon, partikularmente an polisiya nin mass promotion kan mga estudyante.
Bako sana Grade 11 students an apektado kan problema, susog pa sa EDCOM 2, mga 40% kan mga estudyante sa gabos na grado an igwa pa man giraray nin kadifisilan sa pagsabot sa pagbasa.
Mientrastanto, sinabi ni Education Secretary Sonny Angara na tutukan kan DepEd an pagpapakusog kan training kan mga paratukdo ngani na mas mapauswag pa an pagkasabot kan mga estudyante asin bako sana an memorization.
