LEGAZPI CITY – Nakapreparar na an buffer stock na 1, 255 na sako nin bagas na ibabariwas sa mga paraoma na naaapektaran kan namamatiang El Niño sa Catanduanes.
Sa intrevista kan Bombo Radyo Legazpi ki Catanduanes Agriculture Office Rice Report Officer Lorna Vargas, piglalaoman na nagkapira sa mga paraoma an wara talagang magigin ganansya makalihis na totalmenteng madanyaran an rice crops kan penomena.
Tangarig na magin alternatibo asin makatabang sa pagbuhay-buhay, naghagad naman nin asistensya an nasabing oficina sa Department of Agriculture (DA) tangarig na matawanan nin banhi kan mais, mongo asin iba pang gulayon na pwede sa mainit na panahon an mga paraoma.
Igwa man suboot na ipig-oofrecir na insurance sa mga paraoma sa pagbabayad kan danyos sa mga pananom o tangarig na makabalik maski an kapital sana.
Mientras tanto, posibleng matukar man an iba pang medios na gigibuhon sa mangyayaring meeting sa masunod na semana.
